ക്രിസ്ത്യൻ യുവതി – യുവാക്കളെ ലക്ഷ്യമിട്ട് ലൗ ജിഹാദിനൊപ്പം നാർക്കോട്ടിക് ജിഹാദും കേരളത്തിൽ നടക്കുന്നുണ്ടെന്ന പാലാ ബിഷപ്പ് മാർ ജോസഫ് കല്ലറങ്ങാട്ടിൻ്റെ പ്രസ്താവന വിവാദമായി തുടരുന്നതിനിടെ വിമർശനവുമായി കോൺഗ്രസ് പ്രവർത്തക സമിതി അംഗം പി ചിദംബരം. സമൂഹത്തിൽ ചേരിതിരിവ് ഉണ്ടാക്കുന്ന തരത്തിലുള്ളതാണ് ബിഷിപ്പിൻ്റെ പ്രസ്താവന. അദ്ദേഹത്തിൻ്റെ വികൃതമായ ചിന്തകളാണ് പ്രസ്താവനയിലൂടെ പുറത്തുവന്നതെന്നും ഇന്ത്യൻ എക്സ്പ്രസിൽ എഴുതിയ ലേഖനത്തിലൂടെ ചിദംബരം വിമർശിക്കുന്നു.

നാർക്കോട്ടിക് ജിഹാദ് എന്ന വാക്കിലൂടെ ബിഷപ്പ് ലക്ഷ്യമിടുന്നത് മതഭ്രാന്താണ്. ഈ ചിന്താഗതിയെ രാജ്യം പുറന്തള്ളും. വലതുപക്ഷ ഹിന്ദു സംഘടനകൾ ബിഷപ്പിനെ പിന്തുണച്ച് രംഗത്ത് വന്നതിൽ അത്ഭുതമില്ല. ഇരുകൂട്ടരും മുസ്ലീം ഏന്ന അപരനെയാണ് ലക്ഷ്യമാക്കുന്നത്. തീവ്രഹിന്ദു വലതുപക്ഷം ക്രിസ്ത്യൻ സമൂഹത്തെയും അപരവത്കരിച്ച പല സംഭവങ്ങളും നാം കണ്ടതാണ്. ഏതൊരു വിഭാഗത്തെയും അന്യവത്കരിക്കുന്നത് അഭികാമ്യമല്ലെന്നും പി ചിദംബരം വ്യക്തമാക്കി.

പാലാ ബിഷപ്പിൻ്റെ പ്രസ്താവനയ്ക്കെതിരെ മുഖ്യമന്ത്രി പിണറായി വിജയനും പ്രതിപക്ഷ നേതാവ് വി ഡി സതീശനും സ്വീകരിച്ച നിലപാടും മികച്ചതായിരുന്നു. ബിഷപ്പിന് ശക്തമായ മുന്നറിയിപ്പ് നൽകിയ മുഖ്യമന്ത്രിയുടെ നിലപാടിൽ സന്തോഷമുണ്ട്. തെറ്റായ പ്രചാരണം നടത്തുന്നവരെ വെറുതെ വിടില്ലെന്ന മുഖ്യമന്ത്രിയുടെ പ്രസ്താവനയെ പ്രതിപക്ഷ നേതാവ് പിന്തുണച്ചതിൽ ഏറെ സന്തോഷമുണ്ടെന്നും ചിദംബരം പറയുന്നു.

ഹിന്ദുമതത്തെ അല്ലെങ്കിൽ ക്രിസ്തുമതത്തെ ഒരു വശത്തും മുസ്ലീം മതത്തെ മറുവശത്തും നിർത്തി അവിശ്വാസത്തെയും സാമുദായിക സംഘർഷത്തെയും ഉത്തേജിപ്പിക്കാനാണ് ശ്രമം നടന്നത്. മതഭ്രാന്തന്മാർക്ക് ഇസ്ലാം അപരവും മുസ്ലിങ്ങൾ അപരന്മാരുമാണ്. വാക്കിലൂടെയോ പ്രവർത്തിയിലൂടെയോ വിവേചനത്തിൻ്റെ സൂക്ഷ്മ തലങ്ങളിലൂടെയോ പ്രകടിപ്പിക്കുന്ന ഇത്തരം മതഭ്രാന്തിനെ ഒരു മതേതരരാജ്യം തീർച്ചയായും അവസാനിപ്പിക്കേണ്ടതാണ്. യുവാക്കളെയും യുവതികളെയും ഭയപ്പെടുത്താൻ ഹിന്ദു വർഗീയവാദികൾ കണ്ടെത്തിയ വാക്കാണ് ലൗ ജിഹാദ്.

ലൗ ജിഹാദിന് ശേഷം നാർക്കോട്ടിക് ജിഹാദ് എന്നതാണ് പുതിയ വാക്ക്. ഈ വാക്കിൻ്റെ സൃഷ്ടികർത്താവ് പാലാ ബിഷപ്പ് ജോസഫ് കല്ലറങ്ങാട്ടിനെ പൊലെ ഒരു ബിഷപ്പ് ആയതിനാൽ എനിക്കും ദശലക്ഷക്കണക്കിന് ഇന്ത്യക്കാർക്കും വേദനയുണ്ട്. ലൗ എന്നതും നാർക്കോട്ടിക് എന്നതും യാർഥാർഥ്യമാണെങ്കിലും ജിഹാദ് എന്ന പദം ലൗവിനോടും നാർക്കോട്ടിക്കിനോടും ചേർത്തുവെക്കുമ്പോൾ വെളിപ്പെടുന്നത് സങ്കുചിതമായ ചിന്താഗതിയാണെന്നും ലേഖനത്തിൽ ചിദംബരം പറയുന്നുണ്ട്.

LEAVE A REPLY

Please enter your comment!
Please enter your name here